Кайбыч районы башлыгы Альберт Рәхматуллин район оешу көне белән котлый
Бүген яраткан районыбызның туган көне. Кайбычның яңадан район булып оешуына 19 апрельдә нәкъ 29 ел.
Кайбыч өчен аеруча кадерле булган әлеге дата өчен без, иң беренче чиратта, Минтимер Шарипович Шәймиевка тирән рәхмәтле. Чөнки Кайбычны оештыру турындагы Указга 1991 елның 19 апрелендә нәкъ менә ул кул куйды.
Күпмилләтле районыбыз бай тарихлы, аның язмышы Татарстан тормышы белән тыгыз үрелеп бара. Район җитәкчелегенең төп максаты - халыкның яшәешен, тормыш шартларын яхшырту. Шул максатта яңа объектлар, торак йортлар сафка баса, юллар төзелә.
Республика җитәкчелеге ярдәме белән төрле программалар, илкүләм проектлар авылларны танымаслык итеп үзгәртә.
Районның быелгы туган көне Бөек Җиңүнең 75, ТАССРның 100 еллыгында уза.
Без өлкән буын кешеләренең матур эшләрен уңышлы дәвам итәбез. Кайбыч киләчәктә дә чәчәк атсын, аның авыл хуҗалыгы, икътисады гына түгел, демографиясе дә яхшырсын иде дигән теләктә калам.
Язның бер көне ел туйдыра, дигән халык. Шуның өчен бөтен көчне туплап инде кырларга чыгып киләбез. Традицион рәвештә, язгы кыр эшләрен иң кыска срокларда, бөтен агротехник таләпләрне төгәл үтәп башкарып чыгырбыз диеп ышандырасы килә.
Кадерле кайбычлылар! Сезгә чын күңелдән тарихыбызны һәм традицияләребезне, күпмилләтле дуслык һәм тынычлыкны саклавыгызны һәм буыннардан-буыннарга тапшыруыгызны телим. Барыгызга да ныклы сәламәтлек, хезмәттә зур уңышлар насыйп булсын.
Ихтирам белән, Кайбыч муниципаль районы башлыгы Альберт Рәхматуллин.